2474k Gwefan Cymru-Catalonia. Detholion o “Y Cyfaill o’r Hen Wlad yn America” 1840

http://www.kimkat.org/amryw/1_testunau/sion_prys_081_cyfaill_or_hen_wlad_mai_1840_2474k.htm


0001z Yr Hafan / Home Page

..........
1864k Y Fynedfa yn Gymraeg

.....................
0009k Y Gwegynllun

...............................0960k Y Gyfeirddalen i Gywaith Siôn Prys (testunau Cymraeg yn y wefan hon)

...............................................2477k Y Gyfeirddalen i'r Cyfaill o'r Hen Wlad yn America


...............................................................y dudalen hon

 

baneri
..

 

 

 

Gwefan Cymru-Catalonia
La Web de Gal·les i Catalunya


Cywaith Siôn Prys Aberhonddu (Casgliad Arlein o destunau Cymraeg)
“Llond y We o Lên y Brython”



Detholion o “Y Cyfaill o’r Hen Wlad yn America”
Mai 1840
 

 

map o gymru a'r gwledydd catalaneg (map_cymru_pc_drenewydd_050112)

Adolygiadau diweddaraf:
2006-05-18

 

 

 

 

(2) (Rhif 29, Cyfrol 3, Mai 1840, tudalennau 139-141)

CYCHWYNASOM drachefn foreu ddydd Mercher, yn y bâd, â’n gwynebau tua Newark, 138 m. o’r lle olaf. Cawsom rwystr ar y ffordd trwy dòriad y gamlas, a gorfu arnom deithio 11 milltir mewn pedrolfen, (wagon). Yr oedd Mr. Rees y boreu hwn yn ddigalon ac yn llesg, ond dywedai iddo gael cysur oddiwrth y geiriau hyny, ‘He shall cover thee with his feathers.’ Yn mhen ychydig drachefn dywedai, ‘By-and-by, my wretched mortal body will be changed.for an immortality.’ Sylwid y diwrnod hwn hefyd, pa fodd y mae yr Arglwydd yn goddef i’r creaduriaid direswm gael eu poeni am bechodau dyn; hefyd, bod yr Arglwydd yn cospi ei bobl weithiau, fel gwyr Succoth, â drain ac â mieri. Adgoffawyd llawer o ddywediadau enwogion Lloegr a Chymru. Pan gyrhaeddodd y cŵch Newark, yr oedd yn tywyllu nos Iau. Derbyniwyd ni gan y Cymry yno yn garedig. Aeth fy nghyfeillion i’r wlad, llettyais inau yn y dref. Aethym gydâ chyfaill i ymweled â hwynt dranoeth. Gorphwysasom y diwrnod hwnw, a theimlem ein hunain yn flinedig iawn. Tranoeth, buom yn cadw society yn Nghapel Saron ar Fryniau y Cymry. Dydd Sul, y 23ain, pregethodd y Brodyr yno am 10 a 2; ac am 6 yn Newark, yn Nghapel y Bedyddwyr Seisonig: nos Fawrth, yn nhŷ Mr. D. Thomas, Brick-house: a nos Fercher, yn Harrison, yn nhŷ un Mr. Nichols - pregethodd Mr. Rees yn Saesoneg. Dychwelasom yn ol i Granville, lle nodedig am gyfleusterau crefyddol. Tranoeth, am 2, mewn Ysgoldŷ Cerrig ar Fryniau y Cymry, cynhaliwyd cyfarfod Dirwestol. Cawd yno gyfarfod hynod o hwylus. Yr oedd y rhan fwyaf o’r gynulleidfa wedi ardystio cyn hyny. Ardystiodd amrai y pryd hwnw hefyd. Mewn Cyfarfod yn Granville, ychydig ddiwrnodiau cyn hyny, ardystiodd 194 i fod yn Llwyr-ymattalwyr, a 23 yn Gymedrolwyr. Nos Iau, pregethwyd yn y Capel. Nos Wener, Mr. Parry yn Gymraeg, a Mr. Rees yn Saesonaeg, yn nhŷ Mr. Thomas Hughes. Dydd Sadwrn, society yn Saron, pryd y derbyniwyd tri, un o’r newydd, a dau o le arall. Ymdrinwyd hefyd â llawer o bethau na oddefa amgylchiadau y lle hwn i’w crybwyll. Y Sabboth, cynnaliwyd y moddion fel o’r blaen. Cawsom yn y lle hwn eglwys drefnus a rheolaidd, yn cynnwys 48 o aelodau, 3 o swyddogion, 25 o blant yn yr eglwys, a phregethwr, sef y Parch. W. Parry. Maint eu capel yw 30 wrth 30 troedfedd. Ansawdd eu tir hefyd sydd dda, ond lled fryniog. Eu dwfr - a’u cyfleusderau i brynu a gwerthu, braidd yn well nag un man ag a welsom gan y Cymry yn Ohio. Dangosodd y cyfeillion i ni bob bob caredigrwydd. Ymadawson, foreu dydd Llun, a’u gwynebau tua Radnor, mewn cerbyd a anfonwyd oddiyno i’n cyrchu 45 o filltiroedd o ffordd.

 

Cyrhaeddasom y lle hwnw am 11 o’r gloch y nos. Nid oes achos crefyddol gan y Trefnyddion Calfinaidd yn Radnor, ond cydaddolant â’r Annibynwyr. Buom yn llafurio yn eu mysg bob dydd o hyny hyd foreu ddydd Llun. Pregethwyd yno wyth waith, dwy society, ac un Cyarfod Dirwestol. Dangoswyd tiriondeb a charedigrwydd i ni yma hefyd, a hebryngwyd ni ganddynt i Columbus, 35 milltir. Dull gwyneb y ddaear yn Radnor sydd wastad iawn; ansawdd y tir yn lled dda; er hyny yn annghyfleus at lawer o bethau, ac yn agored i’r cryd. Cawsom ddiwrnod poeth iawn, a’r ffordd yn llwchlyd o Radnor i Columbus. Pregethodd Mr. Rees mewn Ysgoldŷ yno i gynnulleidfa o Gymry. Ymddygodd trigolion y lle yn dirion atom; er hyny gwrthwynebid ni yn gadarn gan ryw ddyhiryn atgas, Universalaidd o ran barn. Meddyliwyf iddo gael rhai rhesymau gan Mr. Rees nad annghofia mohonynt yn fuan. Lle dymunol ydyw Columbus. Gwelsom yno lawer o bethau. ond yr hynottaf oedd carcharorion Carchar y Dalaith, o herwydd hon ydyw prif ddinas Talaith Ohio. Gadawsom y lle hwn am wyth boreu ddydd Mawrth, a chydâ y cerbyd ar hyd y National Road i Springfield, ac oddiyno i Cincinnati ar hyd ffordd ddrwg, erbyn 10 ddydd Mercher. Sylwyd ar amryw bethau ar y ffordd, megys y perygl o ieuo yn annghydmarus; hefyd, cynghor y diweddar Barch. Rowland Hill i bregethwyr ieuaingc: 1st. He ought to have a good stock of .sense in his head. 2d. A good stock of the Bible iin his mind; 3d. A good stock of grace in his heart. Cyn diweddu y daith hon, clafychodd Mr. Rees o’r Bilious Fever, er nad yn ddrwg iawn. Dywedai ei fod yn dymuno cael ei addfedu i farw, ond nid yn yr America, ac fel y dywedodd un gŵr duwiol, ‘Please let me down to the grave gently.’ Arferem ninau bob rhesymau a moddion a fedrem i’w ddyddanu. Gweinyddwyd meddyginiaeth ebrwydd iddo yn Cincinnati, a gwellhâodd yn raddol. Gwelsom yno lawer o Gymru, pa rai a ymddygasant yn garedigol i ni. Dangosasant lawer o adeiladau gorwych eu tref, yn enwedig eu marchnad. Cymerasant ni hefyd dros yr afon mewn cwch i Dalaith Kentucky, &c. Mae Cincinnati yn dref fawr a hardd. Dywedent wrthym y bernid ei phoblogaeth yn 40,000. Mae yn lle nodedig am fasgnach. Trosglwyddir mewn agerdd-fadau werth miloedd o ddolerau o nwyfau i lawr ac i fyny yr afon yn flynyddol. Am yr ymwneud a fu genym â’r gwaith yr aethom yno yn ei herwydd, gwel y Cyfaill am fis Medi diweddaf. Cawsom yma gynnulleidfa o Gymry, a chapel hardd o briddfeini, yn 28 wrth 25 troedfedd, yr hwn a godwyd dan olygiad, a thrwy lafur diflin y Parchedig Edward Jones, yn benaf, yn nghydâg eraill. Rhif yr Eglwys Gymreig yw 46 o aelodau, 3 o swyddogion, 28 o blant; a 2 bregethwr, sef y Parchedigion Edw. Jones a David Rosser. Gadawasom y lle hwn am 9 foreu ddydd Mercher, a daethom i Gallipolis am 8 nos Fercher, ar hyd yr afon mewn agerddfad, 200 milltir. Cyd-deithiau â ni lawer o Gymry, y rhai a ddychwelent adref o’r Gymanfa. Yn eu mysg yr oedd y Parch. Robert Williams, a Mr. D. Lewis, Oak Hill; y Parch. W. Morgan, a Mr. John Edwards, Pittsburg, a’r Parch. Wm. Parry, Granville.

 

Boreu ddydd lau, cyrchwyd ni o Gallipolis i Oak Hill, mewn cerbyd, gan Mr. Alban a Mr.David Wynne. Lle bychan, digynnydd, yn cael ei breswylio gan Ffrancod gan mwyaf yw Gallipolis. Y pellder oddiyno i Oak Hill sydd yn nghylch 20 milltir.

 

(3) (Rhif 30, Cyfrol 3, Mai 1840, tudalennau 139-141)
Yr oedd yr hin yn nodedig o wresog tra buom yno. Cwynai fy nau gyfaill o herwydd afiechyd, ac yn benaf Mr. Parry. Ond p’odd bynag, galluogwyd hwynt i fyned drwy y gwaith yn y modd canlynol. Cadwyd society yng nghapel Moriah ddydd Gwener, am 5, a chyfarfod gweddi yn ganlynol. Methodd y brodyr ddyfod yno o herwydd gwaeledd. - Ddydd Sadwrn, am 2, pregethodd Mr. Rees. Boreu Sabboth, am 10, Mr. Parry. Am 2, Mr. Rees. Am 5, pregethasant ill dau. – Ddydd Llun, am 9, society. Yna ffarweliwyd yn hiraethlon ein teimladau. Yma y gwelsom y drefn oreu ar yr Achos crefyddol yn Ohio. Rhif yr Eglwys, 150; swyddogion, 9, pregethwyr, 2, sef y Parchedigion Mr. Robert Williams a Mr. D. Lewis. Caniatáwyd i frawd ieuangc arall arfer ei ddawn yno i bregethu, ond deallais, trwy lythyr oddiwrth gyfaill o’r lle hwnw, iddo orphen ei yrfa cyn dechreu ar y gwaith mawr. Amlwg yw mai nid ein meddyliau ni yw meddyliau yr Arglwydd. Mae gan ein brodyr yno ddau gapel; maintioli un yw 31 wrth 20. Nifer y plant a ddygir i fyny yn yr Eglwys, 86. Sefydliad newydd yw y lle hwn, a’r rhan fwyaf o’r trigolion yn lled isel eu hamgylchiadau, eto yn hynod o ffyddlon gydâ’r Achos. Mae yma rai hefyd yn byw yn gysurus ddigon, ac yn meddu ar eiddo go fawr. Mae i’r lle hwn, fel amryw sefydliadau newyddion eraill, lawer o annghyfleusderau, ond mae yn debyg y symudir hwynt bob yn râdd.

Ymadawsom oddiyno ddydd Mawrth. Lletyasom yn Galipolis y noson hono.

Cychwynasom drachefn dranoeth mewn agerddfad, â’n gwynebau tua Phittsburg, taith o 300 o filltiroedd. Cymerwyd Mr. Parry yn glaf o herwydd y gwrês mawr, gan y bilious fever; ac wedi teithio 2 ddiwrnod a noswaith, gorfu arnom droi i dir, o herwydd fod ei afiechyd yn cynnyddu, a’i fywyd mewn perygl. Enw y lle y troisom iddo yw Wheeling, Talaith Virginia. Ni arosasom yno ond pedair-awr-ar-hugain, Aethom ymaith nos Wener mewn cwch i Steubenville; yna mewn cerbyd, trwy ran o Virginia a Phennsylvania, i Pittsburg, erbyn prydnhawn ddydd Sadwrn, yn hynod o lesg a blinedig. Ymofynwyd am feddyg yn ddioed, a gwellaodd yn raddol.- Dyma y daith fwyaf annghysurus a gawsom, o herwydd afiechyd; ond bu llaw yr Arglwydd yn ysgafn iawn arnom. Peth rhyfedd na fuasem feirw, fel Rahel, wrth deithio, neu Moses ar y mynydd. Gorfu arnom benderfynu peidio myned i Pottsville, a lleoedd eraill, o herwydd afiechyd.

Cawsom yn Mhittsburg, gydâ’r Trefnyddion Calfinaidd, Eglwys drefnus, yn cynnwys 60 o aelodau, 5 o swyddogion, ac un pregethwr, sef y Parch. Wm. Morgan. Ddydd Sul, am 10, pregethodd Mr. Rees, yn nghapel yr Annibynwyr. Am 2, society yn nghapel y Trefnyddion Calfinaidd. Am 6, pregethodd yn yr un lle a’r boreu.

Arosasom yno hyd ddydd Mawrtb, Awst y 5ed. Pregethwyd yno am ryw weithiau yn yr wythnos, cadwyd society, a chyfarfodydd Dirwestol. Yr ail Sabboth, pregethwyd dair gwaith. Ymgasglodd torf fawr o Gymry i wrandaw, y rhan fwyaf yn perthyn i’r gweithiau glo a haiarn. Mae Pittsburg. yn ddinas fawr, ac ynddi, ac o’i chwmpas, lawer o weithfeydd glô, haiarn, gwydr, hoelion, &c. Mae yn sefyll rhwng dwy afon, sef y Monongahela a’r Alleghany, y rhai, islaw y dref, a ymarllwysant i’w gilydd, ac a elwir wedi hyny yn Afon Ohio. Dywedwyd wrthym mai ei lled cyffredinol o Bittsburg i Cincinnati, yw o 500 i 1,000 o droedfeddi; ei hyd, o Bittsburg i Orleans Newydd, lle yr ymarllwysa i’r môr, yw 1,700 o filltiroedd, a dim ond 495 troedfedd o ddisgyniad i’r dwfr ddylifo yr holl ffordd hirfaith.

Gadawsom y lle hwn foreu y 5ed o Awst, yn y cerbyd, a daethom i Chambersburg am 1. Boreu Iau, am 9 drachefn, aethom gydâg ager-gerbydau ar y cledrffyrdd i Philadelphia. Tòrodd yr agerdd-beiriant, ac attaliodd gyflymdra ein taith, ond pa fodd bynag, daethom yno brynhawn ddydd Gwener. Y pellder o Bittsburg i Philadelphia yw 300 o filltiroedd – y 150 cyntaf yn fryniog ac anwastad iawn – y 150 eraill yn hynod o wastad a hyfryd i’r olwg.

Mae Philadelphia yn un o’r lleoedd hyfryttaf a welais erioed. Cawsom yr hyfrydwch o weled yr holl ddinas fawr oddiar fath o dŵr oedd ar nen y tŷ y llettyem ynddo. Synem wrth weled maint y ddinas harddwych, gorwychder ei hadeiladau, trefn a chydsafiad ei hystrydoedd, llawnder ei marchnadoedd o ymborth a thrugareddau, a’i hystordai cyfoethog o bob math o nwyfau eto, ynddangosai pob peth, yn ein golwg ni, yn lled farw a difywyd. Ni welsom un Cymro yn y lle hwn, er fod yma amrai Gymry, ond nis gwyddem pa le i gael eu gweled.

Gadawsom Philadelphia boreu dranoeth am 8, a chyrhaeddasom Gaerefrog-Newydd am 3, gyda’r ager-gerbydau. Derbyniwyd ni yn roesawgar gan y brodyr yno. Ddydd Sabboth, pregethodd y brodyr am 3 a 7 yn nghapel y Bowery. Ddydd Llun bwriwyd golwg dros ein cyfrifon. Trefnwyd pob peth yn eitha’ brawdol a heddychol yn mhresennoldeb y Brawd Wm. Rowlands. Dranoeth, sef dydd Mawrth, ar el ciniawa, y waith ddiweddaf am byth, mae’n debyg gyda’n gilydd, yn nhŷ Mr Roberts, Walker-street, ymneillduasom i ystafell, aeth Mr. Rees i weddi, a sicr wyf na anghofiaf y weddi hono tra fyddwyf byw.

Yna ymadawyd yn alarus a hiraethlon, ar ol teithio gydâ’n gilydd 2,292 o filltiroedd mewn naw wythnos a dau ddiwrnod, heb y meddwl lleiaf o weled ein gilydd mewn cnawd hyd y boreu mawr, pan y rhoddo yr Archangel ei lef, ac y delo y meirw i fyny o lwch y ddaear. Meddyliwn yn aml y dyddiau hyn fy mod yn profi rhyw deimladau tebyg i henaduriaid Eglwys Ephesus, ‘gan ofidio yn benaf am y gair a ddywedasai efe, na chaent weled ei wyneb ef mwy.’ Felly nid wyf yn meddwl gweled eu gwynebau na chlywed eu lleisiau mwy; a thebygol genyf mai dyna brofiadau ugeiniau a channoedd o’m cydgenedl y buom yn ymweled â hwynt, ac a ddangosasant eu caredigrwydd i ni ym mhob lle.

Gobeithiaf hefyd y bydd eu geiriau, eu cynghorion, eu hannogaethau, a’u rhybuddion, yn llefaru eto yn yr America, ar ol eu hymadawiad i Brydain, ac ar ol eu marw hefyd.

Cychwynais inau adref o Gaerefrog-Newydd, yn y dull arferol o deithio. Cefais fy nheulu oll yn fyw ac yn iach, a’m hamgylchiadau yn hollol gysurus.

 

JOHN S. WILLIAMS,

Steuben,

Tach. 12fed, 1839.

-----------------------------------------------------------------------------------------------

 

 

 

 

Sumbolau arbennig: ŵ ŷ
Fformat 100 chwith, 200 de
  

Ble’r wyf i? Yr ych chi’n ymwéld ag un o dudalennau’r Gwefan “CYMRU-CATALONIA”
On sóc? Esteu visitant una pàgina de la Web “CYMRU-CATALONIA” (= Gal·les-Catalunya)
Weø(r) àm ai? Yùu àa(r) vízïting ø peij fròm dhø “CYMRU-CATALONIA” (= Weilz-Katølóuniø) Wéb-sait
Where am I?
You are visiting a page from the “CYMRU-CATALONIA” (= Wales-Catalonia) Website

CYMRU-CATALONIA


Edrychwch ar fy Ystadegau / Mireu les estadístiques / View My Stats